Gall bod yn gorfforol actif drwy gydol eich adferiad ac ar ôl gwella:

• atal y broblem rhag digwydd eto
• cynnal eich lefelau ffitrwydd presennol – hyd yn oed os oes rhaid i chi addasu’r hyn a wnewch fel arfer, mae unrhyw weithgaredd yn well na dim
• cadw’ch cyhyrau a’ch cymalau eraill yn gryf ac yn hyblyg
• eich helpu i anelu at bwysau corff iach Cyfrifiannell BMI

Yn dilyn ymddangosiad symptomau newydd, anaf neu’r ddau, efallai y bydd angen lleihau neu addasu eich gweithgareddau dyddiol i ddechrau.   I rai, gall hyn olygu gorffwys mwy a lleihau rhai symudiadau neu dasgau sy’n anodd ac yn boenus yn ystod y dyddiau cyntaf, megis ymestyn gydag ysgwydd boenus neu blygu ymlaen gyda chefn isaf poenus.   I eraill, gall hyn olygu addasu eu gweithgareddau, megis lleihau faint o eistedd, sefyll, cerdded, tasgau o gwmpas y cartref neu hobïau y maent yn eu gwneud yn ystod y dyddiau a’r wythnosau cyntaf.

Ni chynghorir gorffwys yn y gwely’n barhaus ar gyfer y rhan fwyaf o broblemau cyhyr, cymal ac asgwrn gan ei fod yn oedi gwellhad.   Fodd bynnag, efallai y bydd angen i chi orffwys mwy yn nyddiau cynnar ymddangosiad symptomau newydd neu anaf.   Ar hyn o bryd, eich nod yw perfformio rhai symudiadau ysgafn yn aml yn ystod y dydd, a chynyddu’r rhain wrth i chi deimlo’n fwy abl.

Ym mhob sefyllfa, mae’n bwysig dychwelyd yn raddol i symudiadau a gweithgareddau arferol cyn gynted â phosibl.   Wrth i’r symptomau leihau a’ch hyder gynyddu, dechreuwch ddychwelyd i normal.  Gall hyn fod yn boenus i ddechrau o hyd, ond anaml y bydd hyn yn gwneud unrhyw niwed neu anaf pellach i chi.   Dyma sut mae gwella’n dda.

I’r rhai sy’n newydd i ymarfer corff, dechreuwch gyda thargedau bach cyraeddadwy a’u cynyddu wrth i chi ddod yn fwy heini a mwy hyderus.    Nid oes un ymarfer corff yn well nag un arall.   Mae rhai y mae’n well gennym neu rai sy’n gweddu’n well i ni.   Mae llawer o bosibiliadau i fodloni eich anghenion gweithgarwch ac ymarfer corff.