Dyluniwyd eich corff i newid safle’n gyson.  Mae poen yn cael ei waethygu naill ai gan ormod o weithgarwch neu ddim digon o weithgarwch dros gyfnod hir o amser.  Mae’r cyfnodau amser hyn yn benodol i chi.    Fodd bynnag, mae natur ddynol yn golygu eich bod yn parhau i wneud gweithgareddau nes bod y dasg wedi’i gorffen neu fod y boen yn eich gorfodi i stopio.

Mae gosod cyflymder yn golygu cadw at yr un faint o weithgarwch bob dydd, p’un a ydych yn cael diwrnod da neu wael.  Gall hyn olygu nad ydych chi’n gwneud cymaint ag y credwch y dylech ei wneud ar ddiwrnod da!

Os gallwch osod cyflymder llwyddiannus i’ch gweithgareddau bob dydd, fe welwch eich bod yn cyflawni rhagor dros gyfnod o amser.  Gallwch wneud hyn drwy seilio’r hyn rydych chi’n ei wneud ar gynllun, nid ar sut rydych chi’n teimlo.  Os gallwch osod cyflymder gweithgareddau’n llwyddiannus, fe welwch fod eich stamina yn gwella dros amser.  Bydd eich corff yn addasu ac ni fydd yn rhaid i chi orffwys ar ôl tipyn. Gan fod gennych fwy o stamina, byddwch yn gallu gwneud mwy heb flino neu brofi poen. Er y gallai gosod cyflymder fod yn rhwystredig i ddechrau oherwydd eich bod am fwrw ymlaen a gorffen y dasg, byddwch yn gweld, mewn gwirionedd, ei fod yn eich rhoi mewn rheolaeth o’ch bywyd unwaith eto.  Gallwch gynllunio’n fwy dibynadwy ac ni fyddwch yn cael eich rheoli gan flinder neu boen.

Mae gosod cyflymder yn cynnwys

• Dosbarthu’r gweithgareddau drwy gydol y dydd
• Perfformiad tasgau ychydig ar y tro
• Cyfrif terfynau amser ar gyfer gwahanol weithgareddau – mae pobl sydd wedi dioddef poen am lawer o flynyddoedd yn anwybyddu’r rhybuddion sy’n dweud wrthynt fod y boen yn dwysáu ac yn gwaethygu
• Stopio a newid y gweithgaredd cyn i’ch poen ddechrau cynyddu

Yn y bôn, mae cadw dan reolaeth yn ymwneud â’r tair elfen ganlynol:

1. Blaenoriaethu
2. Cynllunio
3. Gosod cyflymder – mae hyn yn cynnwys peidio â gwneud popeth mewn un tro a chael egwyl cyn bod angen un arnoch chi

Nod gosod cyflymder yw cynllunio a strwythuro eich diwrnod fel y gallwch gynnal lefel gyson o weithgarwch.

Gall gymryd amser ac ymarfer i allu gwneud hyn yn iawn, ond mae pobl yn aml yn canfod, unwaith y byddant wedi cyfarwyddo â’r drefn, eu bod yn gallu gwneud mwy yn gyffredinol.

Mae’n bwysig eich bod yn gosod cyflymder ar gyfer eich holl weithgareddau – gwaith, y cartref ac amser hamdden.  Er mwyn cyflawni hyn, mae’n bwysig eich bod yn deall beth yw eich llinell sylfaen ac, wrth gynllunio, sicrhau eich bod yn cael cyfnodau da o orffwys.

Sut mae gosod cyflymder?

Gall llawer o strategaethau gosod cyflymder eich helpu i fyw’n well gyda’ch cyflwr.  Mae’r rhain yn cynnwys:

• Adnabod eich corff
• Cyfnodau gweithgarwch byr
• Amserlen orffwys
• Trefn
• Blaenoriaethu
• Newid tasgau

Terfynau Amser

Rhan gyntaf y cynllun yw cyfrifo’ch terfynau mewn rhai gweithgareddau sylfaenol.  Bydd hyn yn eich helpu i gadw eich gweithgareddau yr un fath.

Rhan gyntaf y cynllun yw cyfrifo’ch terfynau mewn rhai gweithgareddau sylfaenol.  Bydd hyn yn eich helpu i gadw eich gweithgareddau yr un fath ar ddiwrnodau da a gwael.  Bydd y terfynau amser yn wahanol i bawb.

Mae’r rhan fwyaf o weithgareddau’n cynnwys eistedd, sefyll, cerdded a chanolbwyntio.

1. Pa mor hir y gallech chi wneud pob un o’r gweithgareddau hyn ar ddiwrnod gwael? Ysgrifennwch yr ateb hyn i lawr.  Yna gofynnwch, pa mor hir y gallech chi eu gwneud ar ddiwrnod da? Ysgrifennwch yr amseroedd hyn i lawr hefyd.
2. Gosodwch eich terfynau eich hun ar gyfer pob un o’r gweithgareddau hyn gan ddechrau gyda’ch amser ar gyfer diwrnod gwael neu derfyn amser sy’n disgyn rhwng y ddau.

Mae hyn yn golygu y byddech yn eistedd, sefyll a cherdded gan ddefnyddio’r terfynau amser hyn, gan newid eich osgo/safle am tua dwy funud ar ddiwedd pob terfyn amser os mai’r ffactor cyfyngol yw poen neu orwedd i lawr a gorffwys am y cyfnod hwnnw o amser os mai’r ffactor cyfyngol yw blinder.

I ddechrau, byddwch yn gosod cyflymder ar gyfer gweithgareddau bob dydd gan ddefnyddio eich amseroedd ‘diwrnod gwael’.  Mae hyn yn golygu na fyddwch yn gwneud eich poen neu’ch blinder yn waeth oherwydd rydych chi’n gallu ymdopi â’r gweithgareddau hyn ar eich diwrnodau gwael.  Y peth anoddaf i chi fydd peidio â gwneud gormod ar eich ‘diwrnodau da’.  I ddechrau, mae’n syniad da cyfyngu ar faint o amser rydych chi’n ei dreulio yn gwneud un gweithgaredd.  Er enghraifft, os oes angen hwfro’r tŷ cyfan neu dorri’r lawnt flaen a’r lawnt gefn, yna byddai’n synhwyrol gwneud cyfanswm o 20 neu 30 munud y dydd yn unig (gan gynnwys newid osgo/safle neu gyfnodau gorffwys).  Y rheswm am hyn yw bod angen amser ar eich corff i addasu i wneud mwy.

Enghreifftiau o osod cyflymder

Gosodwch eich terfynau amser eich hun ar gyfer pob un o’r gweithgareddau hyn gan ddechrau gyda’ch amser ar gyfer diwrnod gwael neu derfyn amser sy’n disgyn rhwng y ddau.  Er enghraifft:

• Os yn hwfro neu dorri’r lawnt, byddech chi wedi defnyddio’r safle cerdded.  Felly ar ôl tair munud byddech chi’n stopio ac yn eistedd i lawr am ddwy funud cyn dechrau eto
• Os yn smwddio neu’n gwneud y golch, byddech chi’n sefyll am ddwy funud yn unig cyn gorffwys eto
• Os yn gwylio’r teledu, byddech chi’n eistedd am bum munud ac yna’n sefyll neu’n cerdded o gwmpas am ddwy funud cyn eistedd i lawr eto.  Ar ôl deng munud byddech chi’n rhoi’r gorau i wylio’r teledu’n gyfan gwbl am ychydig funudau