Mae cael digon o gwsg da yn rhan hanfodol o ffordd iach a chytbwys o fyw. Mae cwsg gwael rheolaidd yn eich rhoi mewn perygl o gyflyrau meddygol difrifol, gan gynnwys gordewdra, clefyd y galon a diabetes – ac mae’n lleihau eich disgwyliad oes.

Mae’n amlwg bellach fod noson dda o gwsg yn hanfodol ar gyfer bywyd hir ac iach.

Mae cwsg gwael yn golygu nad yw ein corff yn gallu adfer ac atgyweirio ei hun. Mae symptomau fel poen yn cael eu gwneud yn waeth pan na chawn ddigon o gwsg o ansawdd da.

Pam mae cysgu’n dda i chi?

• Mae cwsg yn hybu imiwnedd
• Mae cwsg yn helpu i reoli pwysau iach
• Mae cwsg yn hybu iechyd a lles meddyliol
• Mae cwsg yn cynyddu eich awydd am ryw
• Mae cwsg yn lleihau’r risg o ddiabetes a chlefyd y galon
• Mae cwsg yn cynyddu ffrwythlondeb

Gall llawer o bobl hefyd deimlo’n flinedig drwy’r amser.  Gelwir hyn yn flinder.

Rydyn ni i gyd yn teimlo’n flinedig o bryd i’w gilydd, ond os ydych chi wedi blino drwy’r amser, byddwch chi eisiau gwybod pam, mae’n siŵr.

Gofynnwch i’ch hun a oes unrhyw rannau penodol o’ch bywyd yn eich blino – gall fod yn gysylltiedig â’r gwaith neu deulu.  A wnaeth unrhyw ddigwyddiadau penodol sbarduno’r teimlad hwn?  Gall ddeillio o ddigwyddiad bywyd mawr fel salwch aelod o’r teulu, diswyddo neu brofedigaeth.

Byddai eich meddyg teulu yn edrych i weld a oes achos corfforol neu seicolegol i’ch blinder ond mae nifer o bethau y gallech eu gwneud i’ch helpu eich hun.  Efallai na fydd angen i chi weld eich meddyg teulu!